Nakiisa ang delegasyon ng Rizal Technological University (RTU) sa Crestron True Blue Roadshow 2026, na ginanap noong ika-26 ng Agosto,2026 sa Conrad Manila, Pasay City, sa pangunguna ng Crestron Singapore.

Tampok sa naturang pagtitipon ang mga bago at makabagong teknolohiya at solusyon para sa mas mahusay na communication, collaboration, learning spaces, at audio-visual systems. Kabilang dito ang mga teknolohiyang maaaring magamit ng mga institusyong pang-edukasyon upang makabuo ng mas moderno, connected, at flexible na learning at working environment.

Pinangunahan ni Dr. Rodolfo L. Ducut, Ikalawang Pangulo para sa Pananalapi at Pangasiwaan, ang delegasyon ng RTU na binubuo nina Dr. Rowell C. Marasigan, FSMO Director; Dr. Sheila G. Manahan, UPAO Director; Dr. Marie Joy C. Castillo, RGASO Director; Dr. Jaevier Villanueva, DPO Director; ITO Kyle Nicole F. Alcantara, MISO Director; AO Ian Oliver C. Moscardo, UPMO Director; AO Shaira Marie P. Rona, HRMDO Director; at Engr. Joan E. Pagilagan, PEMO Director.

Mahalaga ang paglahok ng RTU sa ganitong uri ng technology showcase upang makita mismo ang mga bagong sistema at solusyong maaaring makatulong sa patuloy na digital transformation at modernisasyon ng mga pasilidad at serbisyo ng Pamantasan. Nagbigay rin ito ng pagkakataon sa delegasyon na suriin kung paano maaaring iangkop ang mga makabagong teknolohiya sa mga silid-aralan, meeting at conference rooms, administrative offices, at iba pang learning at collaborative spaces ng RTU.

Nagkaroon din ng pagkakataon ang delegasyon na makipag-usap at makipagpalitan ng pananaw sa mga opisyal ng Crestron Singapore hinggil sa mga kasalukuyang trend sa educational technology, smart campus solutions, at mga posibleng direksiyon at plano para sa hinaharap.

Para sa RTU, ang pagyakap sa teknolohiya ay hindi lamang tungkol sa pagkakaroon ng mga bagong kagamitan. Higit itong nakatuon sa paggamit ng teknolohiya upang mapahusay ang paraan ng pagtuturo at pagkatuto, mapabilis ang mga proseso, mapalakas ang kolaborasyon, at makapagbigay ng mas mahusay na serbisyo sa mga mag-aaral, guro, kawani, at iba pang stakeholders ng Pamantasan.

Ang pakikilahok sa Crestron True Blue Roadshow ay bahagi ng patuloy na paghahanap ng RTU ng mga oportunidad, kaalaman, at makabagong solusyon na makatutulong sa pagbuo ng isang mas moderno, matalino, connected, at future-ready na Pamantasan.